Ames proba a tecnoloxía Wi-Fi para levar internet ás parroquias
[14/09/2005] Acceder a internet de banda larga naquelas zonas a onde non chega o cabo seguramente se converta nunha realidade en moi pouco tempo. Esta mañá presentouse no concello de Ames un proxecto piloto para a conexión á rede mediante a tecnoloxía Wi-fi de 5ghz, que emprega sinais de radio para transmitir os datos. A diferenza do wi-fi convencional a 2.4 ghz, que xa está moi estendido, o instalado en Ames garante un acceso a internet máis fiable, a maior velocidade e máis lonxe.
O operador galego R é o encargado de desenvolver a parte técnica do proxecto logo de gañar un concurso convocado pola Deputación da Coruña. A experiencia desenvólvese tamén nos concellos de Fene e Miño con tecnoloxías diferentes en cada un deles. O obxectivo que se persegue é o de ver cal dá mellores resultados e saber tamén cal é a demanda real do servizo.
En principio vanse beneficiar do proxecto as parroquias de Ameixenda e de Agrón. En total serán 14 os núcleos de poboación que terán acceso á rede anque con diferentes calidades. Así, aqueles lugares situados máis preto das antenas receptoras poderán chegar a velocidades de acceso de 3 megabits por segundo, máis incluso ca unha solución ADSL convencional.
Nas zonas afastadas destas parroquias a velocidade baixa aos 512 quilobits por segundo. Aínda así, esta velocidade é dez veces superior á que se obtén na actualidade polas liñas telefónicas existentes que non soportan ADSL e alomenos vinte veces máis rápida que cos módems conectados a unha liña celular TRAC.
Segundo os expertos, o Wi-fi e a súa evolución #8211;o Wimax- é o futuro cando se fala dun acceso a internet sen fíos e cunha mobilidade absoluta nunha área determinada. O wi-fi de 2.4 ghz. demostrou que era unha opción barata e viable para montar pequenas redes na casa ou entre edificios próximos, pero as súas prestazóns son moi limitadas e non dán bos resultados máis aló duns centos de metros.
A tecnoloxía de instalada en Ames soluciona en parte a cuestión da potencia de alcance e garante unha maior cobertura do servizo cun custe de infraestrutura relativamente baixo. Tal e como sinalou o Xerente de Negocio da empresa R, Antonio Rodríguez, "a tecnoloxía para cubrir as zonas rurais existe, so é necesario que haxa demanda por parte dos clientes".
De momento esta é unha experiencia piloto que tenta dilucidar se a tecnoloxía é fiable e se hai demanda por parte dos usuarios. Se a experiencia sae ben e é rendíbel, o servizo de acceso a internet con tecnoloxía Wi-fi de última xeración pasaría ser indefinido. O alcalde de Ames, Carlos Fernández, sinalou que as miras están postas en "estender a cobertura ao resto do concello para corrixir os desequilibrios tecnolóxicos entre as zonas rurais e as urbanas". Na mesma liña tamén se expresou a concelleira de Comunicación, Pilar Candocia, que engadiu que un dos obxectivos do concello tamén é "levarlles a administración electrónica aos veciños tal e como se está empezando a facer xa desde a páxina web municipal".
A Deputación é quen finanza o proxecto tanto en Ames como nos outros dous concellos #8211;Fene e Miño- onde tamén se están a probar outras opcións de conexión sen fíos. A deputada provincial Raquel Jabares, indicou que "alí onde non cheguen as empresas deben ser as administracións as que poñan o diñeiro enriba da mesa para que todos poidan acceder a estes servizos".
No principio do proxecto, que durará seis meses, haberá conexión de balde para alomenos 75 veciños. Calquera veciño de Agrón ou Ameixenda que queira participar nel terá que inscribirse chamando ao teléfono 900 825 925. A empresa R tomará nota da solicitude e pasará en breve polo seu domicilio para instalarlle a antena receptora e dálo de alta no servizo.
A Concellaría de Comunicación tén previsto presentarlles o proxecto aos veciños dentro duns días.
concellodeames.org/comunicacion/nova.php…&id_nova=112